Fífusalir taka þátt í nýju NordPlus verkefni

Í síðustu viku fóru Guðbjörg Lilja Svansdóttir og Carmen Valencia Palmero, deildarstjórar í Heilsuleikskólanum Fífusölum, til Stokkhólms til að vinna að nýju NordPlus-verkefni. Verkefnið ber yfirskriftina „Healthy and happy“ og er samstarfsverkefni Svíþjóðar, Finnlands og Íslands. Markmið verkefnisins eru:

– Að fræðast um heilbrigðan lífsstíl

– Að hvetja nemendur og kennara til að hreyfa sig og lifa heilbrigðu lífi

– Að fræðast um íþróttir og mat í samstarfslöndunum

– Að bæta enskukunnáttu

– Að fræðast um Norður-Evrópu

– Að skrásetja starfið þannig að úr verði hugmyndabanki fyrir alla samstarfsaðila

– Að fræðast um skóla, kennslu og menntakerfi í samstarfslöndunum

Endanleg útkoma verkefnisins er bloggsíða sem mun nýtast sem hugmyndabanki fyrir fræðslu um hreyfingu og heilsu. Hver skóli setur efni inn á síðuna amk tvisvar í mánuði og segir frá starfsemi sinni. Þannig geta skólarnir fylgst með starfsemi hvers annars og fengið innblástur og nýjar hugmyndir sem nýtast í kennslunni. Bloggsíðan er ennþá í mótun en hægt er að skoða hana hér:

http://nordplushealth.wordpress.com/

Heilsuvikur framundan í leikskólanum Kór

Dagana 23. sept. – 4. okt. verða Heilsuvikur í leikskólanum Kór í Kópavogi. Verða börnin sérstaklega frædd um vatnið og hvað er hollt eða óhollt fyrir þau. Á þessu tímabili verður þeim boðið að taka með sér ávöxt eða grænmeti í leikskólann, eitthvað sem þeim finnst gott eða eitthvað sem þau vilja fræðast um. Þessar vikur munu börnin fá að kynnast, fræðast, velta fyrir sér og smakka þá ávexti og grænmeti sem komið verður með. Einnig verður mikil áhersla lögð á að fræða börnin um hreyfingu, hvar og hvernig maður hreyfir sig, farið verður í vettvangsferðir, útileiki og fleira í þeim dúr.

Háaleiti 5 ára

Leikskólinn Háaleiti í Reykjanesbæ fagnaði 5 ára afmæli sínu í gær, 2. september. Í tilefni dagsins var haldið ball í hreyfisalnum þar sem nemendur og kennarar skólans dönsuðu við frábæra tónlist. Eftir ballið var svo boðið upp á skúffuköku. Háaleiti hefur verið heilsuleiksóli frá árinu 2010 og er rekinn af Skólum ehf.

Ungbarnaleikskólinn Ársól verður heilsuleikskóli

Þann 13. júní sl. fékk ungbarnaleikskólinn Ársól viðurkenningu sem heilsuleikskóli. Ársól er 24. leikskólinn sem fær þessa viðurkenningu en jafnframt fyrsti ungbarnaleikskólinn á Íslandi. Nýr menntamála-ráðherra, Illugi Gunnarsson, flutti ávarp og Kristín Eiríksdóttir, formaður Samtaka heilsuleikskóla, afhenti Berglindi Grétarsdóttur skólastjóra Heilsufánann og viðurkenningarskjal. Eftir vígsluna var gestum boðið upp á léttar veitingar í anda heilsustefnunnar.

Ársól er tveggja deilda leikskóli fyrir börn á aldrinum 9 mánaða til 3ja ára, sem starfar í Reykjavík á vegum Skóla ehf. Heimasíða Ársólar

Fífusalir í Kópavogi orðinn heilsuleikskóli

Miðvikudaginn 8. maí 2013 bættist leikskólinn Fífusalir í Kópavogi í hóp heilsuleikskóla og fékk  afhentan heilsufánann. Heilsuleikskólinn Fífusalir er þar með orðinn aðili að Samtökum Heilsuleikskóla og hefur uppfyllt markmið og viðmið heilsustefnunnar í leik og starfi. Athöfnin fór fram í leikskólanum kl 14:30 þennan dag og var boðið upp á skemmtiatriði og heilsusamlegar veitingar. Fífusali bjóðum við velkominn í hóp heilsuleikskólanna.

 

Góðar niðurstöður úr viðhorfskönnun foreldra í heilsuleikskólanum Bæjarbóli

Foreldrakönnun er fastur liður í innra mati heilsuleikskólans Bæjarbóls í Garðabæ  og þetta árið voru foreldrar spurðir um samskipti, umönnun og upplýsingagjöf en það er samkvæmt matsáætlun  leikskólans. Í 18. gr. laga um leikskóla nr. 90/2008 er kveðið á um að hver leikskóli skuli meta með kerfisbundnum hætti árangur og gæði skólastarfsins. Matið skal fara fram með fjölbreyttum hætti og skulu starfsfólk, foreldrar, börn og foreldraráð taka þátt í því eftir því sem við á. Könnunin var send foreldrum rafrænt eftir foreldasamtöl í mars og voru niðurstöðurnar greindar og ræddar á starfsmannfundi. Leikskólinn er  ánægður  með niðurstöðurnar en þær eru  góð endurgjöf fyrir starfsfólk leikskólans. Niðurstöðurnar má  á heimasíðu leikskólans http://www.baejarbol.is/frett?NewsID=16071

Fjölskylduhátíð og 12 ára afmæli Króks

Miðvikudaginn 6. febrúar verður haldið upp á 12 ára afmæli Heilsuleikskólans Króks í Grindavík. Í leiðinni verður haldið upp á Dag leikskólans og slegið upp veglegri fjölskylduhátíð. Börnin bjóða fjölskyldum sínum (mömmu, pabba, systkinum, afa, ömmu eða örðum sem þau óska) til veislu kl 9:30-11:00. Boðið verður upp á leik, samveru og veitingar þar sem foreldrar og starfsfólk leiða saman hesta sína. Slóðin á heimasíðu Króks er hér.

 

 

Ræða Ástu Ragnheiðar á afmælisdegi Unnar Stefánsdóttur

Það kom ferskur vindur með Unni Stefánsdóttur inn í kvennastarfið í Framsóknarflokknum fyrir þremur áratugum þegar við hittumst fyrst. Ég var uppfull af jafnréttisbaráttunni, komandi úr kvennaframboðinu, og lítið annað komst að hjá mér þá stundina. Unnur var líka mikill jafnréttissinni, – en hún hafði ýmis önnur hugðarefni sem hún bar mjög fyrir brjósti og voru ekki sérstaklega hátt skrifuð í Framsóknarflokknum þá. Það var heilsueflingin og hollustan. Hún var keppnismannsekja eins og allir sem þekktu hana vita og lét ekkert á sig fá þótt einhverjir flissuðu að þessu heilsutali hennar. Hún hélt áfram hnarreist og brosandi.

Hún varð formaður Landssambands framsóknarkvenna árið 1985. Við stjórnarkonurnar tókum undir með henni og gerðum heilsu og manneldismálin að okkar áherslumálum. Hún hreif okkur með sér og hollustumálin urðu samhliða jafnréttinu. Hún sýndi í verki áherslur sínar og stefnu og bauð upp á niðursneidda ávexti, grænmeti, safa og aðra hollustu á fundum, – þar sem vínarbrauð, sætmeti og kaffi hafði haft fastan sess. Við settum manneldis- og neyslustefnu sem forgangsmál fyrir tilstilli hennar og ég sannfærðist og varð eldheitur talsmaður hollustunnar.

Þegar ég fór í fyrsta sinn inn á þing í upphafi árs 1987 sem varamaður fékk ég í hendur þingsályktun frá Noregi á norsku um opinbera manneldis- og neyslustefnu til að flytja á þinginu, sem Unnur hafði útvegað og það var ekki aftur snúið. Í framhaldinu þrýstu konurnar með Unni í fararbroddi á heilbrigðisráðherra Framsóknar, Guðmund Bjarnason, að leggja fram slíka stefnu, sem hann gerði.

Heilbrigðismálin, heilsuefling og hreyfing urðu mín helstu áherslumál síðar, meðal annars vegna áhrifa frá Unni og hennar baráttu. Hún hafði sannfært mig, eins og svo marga aðra. Þar sem hér eru allmargir stjórnmálamenn get ég fullyrt að hún hafði mikil áhrif á forvarnar- og heilsubaráttu þeirra margra, og nefni ég Siv Friðleifsdóttur fv. heilbrigðisráðherra sérstaklega, að öðrum ólöstuðum.

Unnur var trú sinni stefnu, eitilhörð á sinn hægláta hátt. Það var sama hvað á gékk til að reyna að bregða fyrir hana fæti í þessum hollustuleiðangri. Hún stóð alltaf keik og lét ekkert aftra sér. Hún var sjálf sjálft heilbrigðið uppmálað. Hún var aðdáunarverð og henni var ekki fisjað saman. Hún var hrein og bein og mjög sérstök manneskja. Hún var á undan sinni samtíð, stóð með sannfæringu sinni óhrædd og huguð.

Þegar ég starfaði í Tryggingastofnun var Unnur að vinna að heilsueflingarverkefni fyrir Heilbrigðisráðuneytið og Landlækni. Þá voru Tryggingastofnun, Landlæknir og ráðuneytið til húsa við Hlemm í sama húsi. Lágu leiðir okkar þá oft saman og var ánægjulegt að fylgjast með ötulu stafi hennar,  hún var ótrúleg. Það voru plaköt, bæklingar, leiðbeiningar og hvaðeina. Þetta var á þeim tíma sem skilningur var ekki mikill á þessum málum og hún mætti oft þessum takmarkaða skilningi.

Hún var í heilbrigðis- og hollustuleiðangri í lífinu og fór alla leið. Hvort sem var heima eða að heiman. Var alltaf sjálfri sér samkvæm. Hún var sannkallaður trúboði heilsustefnunnar eins og einn fyrrverandi heilbrigðisráðherra, Ingibjörg Pálmadóttir, orðaði það svo ágætlega við mig. „Þetta með matinn var henni heilagt.“ Og hún barðist fyrir styrkjum og fjárveitingum til málefnisins, hvar sem matarholu var að finna.

Þótt Unni hafi verið skammtaður takmarkaður tími í árum talið hér á meðal okkar, þá er tíminn ekki endilega sá mælikvarði sem rétt er að nota á lífið heldur hversu miklu menn fá áorkað í lífinu, hversu mikil áhrif þeir hafa á samtíð sína og hvort þeir marki þar spor. Unnur áorkaði miklu í lífinu, hún var afburða keppnismaður í  öllu sem hún tók sér fyrir hendur eins og íþróttamet og annar árangur hennar sýnir.

Hún á glæsilega fjölskyldu, mannvænleg börn sem hún sinnti mjög vel og var stefnumálum sínum trú í hvívetna við uppeldið. Ég minnist líka nýstárlegra uppeldisaðferða við ungbörn sem hún beitti við Hörpu Dís og vakti athygli. Nokkuð sem ég get ekki séð annað en að hafi gefist afar vel.

Hollustan var hennar höfuðmál og þar náði hún að hafa áhrif á heila kynslóð – svo og komandi kynslóðir, því „ungur nemur, gamall temur“. Unnur var frumkvöðull, –  og frumkvöðulshlutverkið er erfitt. Frumkvöðlar þurfa að fara grýtta braut til að ná sínu fram. Þá braut fór hún og gafst aldrei upp og kvartaði aldrei ef á móti blés. Hún fór hana á sinn hátt með bros á vör og léttri lund. Árangurinn er meðal annars það sem við sjáum og höfum heyrt í dag, – heilsuleikskólarnir orðnir 21 og þeim mun fjölga og heilsustefna sem er orðin sjálfsögð.

Það er mér sönn ánægja að fá að opna heimasíðu heilsustefnu Unnar Stefánsdóttur sem er verðugur minnisvarði um hennar mikla brautryðjendastarf í manneldismálum og heilsuvernd. Komandi kynslóðir verða í ævarandi þakkarskuld við hana. Ég opna hér með formlega heimasíðu heilsustefnu Unnar Stefánsdóttur.

ÁRJ/ 18. jan. 2013.

 

Urðarhóll fær Grænfánann

Föstudaginn 19. október mun Gerður Magnúsdóttir fulltrúi Landverndar afhenda Heilsuleikskólanum Urðarhóli Grænfánann. Boðið verður upp á heitt kakó og kleinur á milli kl 8:30 og 9:00.

Grænfáninn er umhverfismerki sem nýtur virðingar víða í Evrópu sem tákn um árangursríka fræðslu og umhverfisstefnu í skólum. Það sem af er árinu 2008 hafa 38 skólar fengið náð fyrir augum stýrihóps Landverndar um Grænfána og hafa fengið fána í vor eða fá hann í upphafi skólaárs í haust. Þetta eru 15 leikskólar, 22 grunnskólar og einn framhaldsskóli. 25 þessara skóla eru nú að fá sinn fyrsta fána en hinir að fá fána í annað, þriðja eða jafnvel fjórða skipti.