Næring

Hollt fæði er grunnur að almennri heilsu einstaklings s.s. líkamlegri og andlegri vellíðan, þroska, ónæmi og frammistöðu alla ævi. Í æsku er hollt fæði sérstaklega mikilvægt vegna þess að á þessu tímaskeiði fer fram mesti vöxtur og þroski ævinnar. Lögð skal áhersla á að börnin fái hollan og næringarríkan mat úr sem flestum fæðuflokkum og að notað sé sem minnst af harðri fitu, sykri og salti í matargerðinni.

Leggja skal áherslu á að auka grænmetis- og ávaxtaneyslu barnanna og vatn skal vera aðgengilegt fyrir börn og starfsmenn. Við samsetningu matseðla skal tekið mið af markmiðum Lýðheilsustöðvar varðandi næringu barna og fá næringarráðgjafa til að fara yfir matseðla og næringarinnihald.

Markmið:

• að börn læri að borða hollan,næringarríkan og fjölbreyttan mat
• að auka grænmetis- og ávaxtaneyslu barna
• að börn tileinki sér góðar matarvenjur
• að börn verði meðvituð um hollustu og óhollustu matar

Börn hafa ríka þörf fyrir að hreyfa sig frjálst og óhindrað. Í leikskóla ber því að leggja áherslu á hreyfingu barna og hreyfiuppeldi.  Börn tjá sig snemma með hreyfingum, þau skynja líkama sinn og  finna styrk sinn og getu.  Góð hreyfifærni eykur sjálfstraust barns og hreyfing bætir heilsu, snerpu og þol.  Líkamlegri áreynslu fylgir hvíld og þar skynjar barn mun á spennu og slökun.

Í markvissri hreyfiþjálfun eflist alhliða þroski barnsins. Barnið öðlast betri líkamsvitund og góð líkamleg færni leiðir af sér ánægðara barn. Sjálfsöruggt og ánægt barn á auðveldara með að leika sér og tileinka sér þekkingu. Markviss hreyfiþjálfun hefur einnig áhrif á málþroska og málskilning barna og þar með eykst félagsfærni og leikgleði sem eflir vináttubönd.

Umhverfið þarf að bjóða upp á möguleika bæði til gróf- og fínhreyfinga til að styrkja barn líkamlega, andlega og félagslega, úti og inni.

Í heilsuleikskóla skal leggja áhersla á markvissa og skipulagða  hreyfingu a.m.k. 1 sinni í viku fyrir hvert barn frá 2 ára aldri, sem stuðlar að líkamlegri og andlegri vellíðan ásamt gleði.

Markmið með hreyfingu:

– að efla líkamsvitund barna

– að efla hreyfiþroska barna, hreyfigetu og auka með þeim úthald og styrk

– að þjálfa samhæfingu  og stuðla að andlegri og líkamlegri vellíðan barna

– að kenna börnum að fylgja fyrirmælum, sýna tillitsemi og efla með þeim samvinnu

Listsköpun

Barn hefur mikla þörf fyrir að skapa og gerir það allar stundir í leik sínum. Það, að vinna út frá eigin forsendum og með þann efnivið sem það kýs hverju sinni, gefur barni færi á að þroska alla hæfileika sína. Skapandi starf eflir gagnrýna hugsun barna, þjálfar rökhugsun og eflir skynjun barns og næmi fyrir umhverfinu.

Mikilvægt er að vinna með og/eða tengja saman fjölbreytt tjáningarform listsköpunar s.s. myndlist, tónlist og leiklist. Lögð skal áhersla á markvissa listsköpunartíma frá 2 ára aldri, þar sem unnið er með einn eða fleiri þætti listsköpunar. Markmiðið er að viðhalda forvitni, sköpunargleði, efla sjálfstraust og ímyndunarafl barna. Sjálft sköpunarferlið skiptir meira máli en útkoman. Lögð skal áhersla á að börn fái tækifæri til að prófa sig áfram með fjölbreyttan efnivið, geri tilraunir og þjálfi upp færni sem leiðir af sér að þau verði viss um eigin getu.